ألاقى فين: مراكز بتقدم كورسات تمثيل وإخراج وسيناريو وتصوير فى المركز أو أونلاين

من أكتر الكورسات اللى بييجى لنا طلب عليها فى مجال السينما هى كورسات التمثيل والإخراج يليها السيناريو والتصوير، وفى ظل ظروف أزمة الكورونا اللى بيمر بها العالم، ناس كتير بتدور على كورسات أونلاين علشان تطور من مهاراتها أو فيديوهات ممكن تشوفها وتتعلم منها، وفيه اللى بينزل يروح يحضر كورسات عادى مع مراعاة الإجراءات الاحترازية زى التباعد الاجتماعى والكمامة.

فى الموضوع ده هنقول لكم إيه أفضل المراكز اللى بتدى كورسات فى مجال التمثيل والإخراج والسيناريو والتصوير فى القاهرة والجيزة أو أونلاين بتقدم مجانًا أو بمقابل مادى.

مركز One Shot Workshop:

بيقدم المركز كورسين فقط تحت إشراف نقابة المهن السينمائية وبتحصل منهم على تصريح بمزاولة المهنة هما Film Making, Scriptwritingإلى جانب كورسات تانية فى مجالات: Cinematography – Film Documentary – Acting Workshop.

بيقدموا ورش مع أقوى المدربين فى المجال الفنى: دبلومة الإخراج السينمائى مع المخرج مجدى أحمد على، كورس كتابة السيناريو مع الكاتب أحمد مراد، وكورس كتابة الرواية مع الكاتب محمد صادق، ودبلومة المؤثرات البصرية VFX تحت إشراف أحمد جبه، وكورس التصوير السينمائى مع مدير التصوير أحمد حسين، وكورس تمثيل مع المدرب سـامح عزت، وكورس الموسيقى التصويرية مع الموسيقار عمرو إسماعيل.

المركز بيتبع إجراءات الأمان ولازم ارتداء الكمامة أثناء حضور الورش.

مكان المركز: مدينة نصر

مركز Pro Step Film School:

يقدم المركز كورسات فى جميع مجالات صناعة السينما تحت إشراف نقابة المهن السينمائية زى السيناريو، الإخراج، التصوير، المونتاج، التمثيل.. إلخ، وبيتم منح خريجى أقسام سيناريو، إخراج ومونتاج عضوية انتساب لنقابة المهن السينمائية علشان يقدروا يلتحقوا بالعمل فى الحقل السينمائى.

الشهر ده عاملين كورسات فى مجالات: التمثيل المتقدم مع فيدرا، والإخراج مع المخرج محمد بكير، والسيناريو مع السينارست هشام هلال، وتمثيل للمبتدئين مع سلوى محمد على، والتمثيل للـTeenagers  من سن ١٠-١٨ سنة مع ديانا هشام.

مكان المركز: المهندسين

Arab Film School:

مركز بيقدم كورسات فى مجال السينما بفروعها: السيناريو والتصوير وكتابة الرواية والإخراج أونلاين وداخل المركز، وفيه بعض الورش هيقدموها بشكل مجانى (لكن الأعداد محدودة) زى الشهر ده منظمين محاضرة مجانية مع الكاتب أحمد مراد.

مكان المركز: القاهرة الجديدة

أكاديمية كاليبر وعلى بدرخانCalibre Film Academy - :

أكاديمية رائدة فى صناعة الأفلام، ودورات السينما، والتمثيل، والإخراج، وكتابة السيناريو، والتصوير السينمائى، والماكياج السينمائى وغيرها من تخصصات السينما وتؤهل للحصول على عضوية نقابة المهن السينمائية.

الشهر ده فيه ورشة للمخرج الكبير على بدرخان بعنوان "دورة صناعة الأفلام (إخراج - مونتاج - سيناريو - تصوير)، ودورة التمثيل للسينما والفيديو مدتها ٣ شهور هتتعلم فيها فن التمثيل أمام الكاميرا وتبدأ طريقك كممثل محترف.

مكان المركز: الدقى

أكاديمية دهبDahab Media Academy - :

دورات تدريبية فى مجال السينما والتقديم الإذاعى والتليفزيونى على يد مدربين على أعلى مستوى من الاحتراف والخبرة كل فى مجاله، بيقدموا الفترة دى كورسات فى مجالات: كتابة السيناريو الاحترافى مع د. مدحت العدل، وكورس إخراج ومبادئ تمثيل مع الفنان حسين فهمى، وكورس الإخراج السينمائى والتليفزيونى مع المخرج أحمد خالد موسى.

مكان المركز: الدقى

Luke Lehner Studios:

ستوديو لتعليم التمثيل لمختلف الأعمار وجميع المستويات، أسسه لوك لينر، عنده خبرة أكثر من ١٥ سنة فى المسرح والتدريب، رجعوا نشاط الورش تانى من فترة قليلة سواء للمبتدئين أو لمستويات متقدمة، كل ورشة هتكون لمدة شهر واحد (8 حصص) مرتين فى الأسبوع بسعر 3500 جنيه.

مكان المركز: المعادى

تياترو ستوديو – Teatro Studio:

تياترو ستوديو بيقدم ورش فنية مختلفة للأطفال وللكبار زى: إعداد ممثل للأطفال، وإعداد ممثل للكبار وورش تانية كتير مع مدربين محترفين وبتسهيلات كبيرة جدًا فى الدفع.

عاملين ورش فى مجالات: التمثيل مع الممثل محمد عادل، والأداء الصوتى مع الفنانة فاطمة عادل وغيرهم.

مكان المركز: المهندسين

الأفلامجية– AlAflamgeya:–

الأفلامجية منصة لنشر محتوى عربى لتمكين المهتمين بصناعة فن السينما والمحتوى المرئى، الصفحة بتنشر فيديوهات بينتجها شركة "المصنع" للإعلام الرقمى مؤسسها أحمد نجيب.

على صفحة الفيسبوك بينزلوا فيديوهات بيقدمها المخرج عمرو سلامة بتتناول موضوعات مهمة جدًا زى أهمية السيناريو، والتعامل مع فريق العمل، وإزاى تنجح كمخرج، وأنواع الشخصيات وغيرها كتير ممكن تشوفوهم من هنا.

إرتجاليا- Irtigalia:

صفحة على الفيسبوك بتقدم ورش فى فن الارتجال للممثلين من سن 18 سنة ولا يشترط أن يكون عندك خبرة سابقة، الورشة بتعزز أدوات الممثلين المشاركين فى الاستجابة التلقائية من قِبل الممثلين الآخرين فيقدروا يعملوا مشهد منظم من لا شىء، والجميل كمان أنهم بيخلوا متابعين الصفحة يشاركوا بجمل ويتم عمل ارتجال عليها.

السكة– ElSekka Studio:–

السكة مكان لتدريب المهتمين بصناعة الفيلم بداية من تكوين الفكرة وكل المراحل اللى فى السكة لغاية ما يوصل المنتج الأخير للمشاهد، بيعملوا ورش تدريب فى مجالات الميديا وصناعة الأفلام زى: الهندسة الصوتية مع مهندس الصوت فيكتور إدوارد والتمثيل مع هانى طاهر، وكمان مجالات التأليف والسيناريو، الإخراج، التصوير، والمونتاج، وكمان بيوفروا مساحات للشغل والمذاكرة والبروڤات والتسجيل.

أما بالنسبة للكورسات الأونلاين بيعملوا فيديوهات على صفحة الفيسبوك بيقدمها المدرب والممثل هانى طاهر بالتعاون مع شورييل – Showreel اللى بيقدموا ورش أونلاين وبعد انتهاء الورش بيعملوا لك شورييل لك مجانًا وكمان خدمة تسويق للمتدربين، كل أسبوع فيديو جديد بمعلومة عن التمثيل تستخدموها فى مشهد من تمثيلكم، وتبعتوها على صفحة السكة.

ورشة"ابدأ حلمك" لإعداد الممثل (أونلاين):

ورشة دائمة على اليوتيوب تابعة لوزارة الثقافة، بيقدمها د. علاء قوقه رئيس قسم التمثيل بالمعهد العالى للفنون المسرحية، نزلوا 40 حلقة لحد دلوقت وكل حلقة بتتناول موضوع مختلف، تقدروا تتابعوها من اللينك ده.

من سيربح الأوديشين؟ (أونلاين)

حلقات بيقدمها المدرب أحمد أشرفى على صفحة VYBZ على الفيسبوك، ممكن تتابعوها من هنا.