ألاقى فين: مراكز بتقدم كورسات فاشون وتصميم أزياء

سواء كنت فاشونيستا أو بتتابعى أحدث خطوط الموضة، مافيش شك أن كورسات التفصيل والخياطة بتديكى تقل وخبرة أكبر وبتخليكى قادرة تصممى لبسك على مزاجك، وبيكون مميز لأن تصميمه مش عند حد غيرك، أى حاجة بيتحط لها تاتش شخصى بتفرق كتير، المجال ده كمان مش قاصر على البنات بس، فيه أسماء كتيرة جدًا اتشهرت فى المجال مؤخرًا من مصر زى مهند كوجاك حقق نجاح كبير، المهم فى المجال أن يكون عندك شغف له.

لو أنت مهتم/ مهتمة بمجال تصميم الأزياء تقدر/ تقدرى تحضر كورسات فى مجالات: التفصيل أو الخياطة أو التشكيل على المانيكان أو ستايلنج، وفيه دبلومات بيقدمها مراكز فى القاهرة والجيزة بتعلمك كل حاجة عن المجال ده وبتتخرج منها جاهز أنك تشتغل بشكل بروفيشنال فى أكبر دور الأزياء فى مصر أو بشكل فردى، طيب فين الأماكن دى فى القاهرة/ الجيزة؟ تعالوا نعرف تفاصيل أكتر:

مركز التصميمات والموضة – Fashion & Design center (FDC)

مركز التصميمات والموضة، هو أحد المراكز التكنولوجية التابعة لمجلس الصناعة للتكنولوجيا والابتكار بوزارة التجارة والصناعة، من أوائل المراكز فى مصر لتعليم الفاشون، شغالين من 2001، والمركز له فرع كمان فى إسكندرية.

الطالب فى المركز بيحصل على شهادة معتمدة علشان يقدر يشتغل بها مصمم فاشون بشكل احترافى، الشهادة بيكون عليها ختم الوزارة ومعتمدة من المركز الإيطالى Istituto di Moda Burgo اللى عندهم خبرة أكتر من 40 سنة فى المجال، وبيدرسوا فى المركز المنهج بتاعه.

فيه آلاف اتخرجت من عندهم وشغالين مصممين فى مصانع وبشكل فردى، عندهم كورسات منفصلة وفيه دبلومة كاملة، وكمان بيعملوا ورش بره القاهرة فى المحافظات وبعضها بتكون مجانية (مدعمة)، وكمان بيساعدوا الطلبة أنهم يعملوا براند خاص بهم ويدخلوا سوق العمل ويعرفوا إزاى يسوقوا لشغلهم.

مكان المركز: عابدين

Fashion Studio Cairo

المركز من حوالى 5 سنين، بيقدم المركز كورسات فى مجالات: رسم وتصميم أزياء وباترون وخياطة على أعلى مستوى، وفيه عندهم دبلومة شاملة بتدرس فيها كل الحاجات دى، وفى نهاية الدبلومة بتاخد شهادة من المركز ولو عاوز تعتمدها بتدفع Fees زيادة وبتعتمدها من وزارة الصناعة أو نقابة التطبيقيين.

مكان المركز: أرض الجولف/ مدينة نصر.

Italian Fashion Academy

أول مكان فتح لتعليم الفاشون فى مصر، بقى لهم 11 سنة، أسسته ستيفانيا جلينا، بيقدم المركز كورسات فى مجالات مختلفة هى: Fashion Design – Pattern Making – Styling – Draping  - Fashion Marketing – Public Relations – Branding – Fashion Photography

بيقدم المركز فى نهاية أى كورس أو الدبلومة (مدتها سنة) شهادة معتمدة من الحكومة الإيطالية، ممكن تشتغل بها مصمم فاشون بره مصر، ميزة الدراسة فى المركز أنها One to One مش بتبقى فى جروب، وبتبدأ أى وقت مناسب للشخص أول ما يحجز، يعنى أنت اللى بتختار الوقت.

مكان المركز: الدقى

Kemet Art & Design

بيقدم المركز كورسات فى مجال تصميم الأزياء وعمل الباترون والخياطة والتفصيل، وكمان تصميم الشنط والأحذية والإكسسوار، ده غير كورسات فى مجالات مختلفة غير الفاشون زى:

Interior Design - Photography & Editing – Sketching & Drawing- Digital Painting – Infographic –Furniture Design – Typography Design

مكان المركز: وسط البلد (داخل الجريك كامبس)

أكاديمية الحرف اليدوية - Handmade Academy:

أكاديمية الحرف اليدوية مهمتها تنمية المهارات والمواهب الفنية ومساعدة الطلبة فى إيجاد فرصة عمل مناسبة أو إنشاء مشروع تجارى خاص ومساعدته على تسويقه، إلى جانب تصدير المنتج المصرى للخارج، بتقدم الأكاديمية دورات احترافية فى: التفصيل والخياطة، التريكو اليدوى، التطريز، الكروشيه، الرسم والطباعة على القماش، الإيشاربات والطرح المشغولة والمطرزة وغيرها.

مكان المركز: مدينة نصر

ساقية عبد المنعم الصاوى – Sawy Culturewheel

ساقية عبد المنعم الصاوى بيقدموا ورشة خياطة وتفصيل لأعضاء الساقية من سن 14 سنة (قيمة العضوية 100 جنيه لمن هم تحت العشرين أو فوق الستين، و150 جنيه لمن هم بين العشرين والستين، وتجدد سنويًا)، الورشة بتقام مرة أسبوعيًا، ولمدة ساعتين (8 ساعات شهريًا).

مكان المركز: الزمالك

كورس خانة – Course Khana

بيقدموا كل فترة كورس باترون وتفصيل وخياطة، عبارة عن 12 محاضرة (إجمالى 36 ساعة) من سن 15 سنة فيما فوق، الكورسات فنية وحرفية، هدفها أنها تساعدك تنتج مُنتج تقدر تبيعه أو تساعدك تتعلم حرفة تستفيد منها فى حياتك اليومية علشان تصلح أو تصنع حاجات بنفسك.

مكان المركز: الورشة خانة – التجمع الأول.

آرت كافيه – Art Café

بيقدموا كورسات فى جميع المجالات الفنية والرسم وشغل الهاندميد والتصميم الداخلى Interior Design، وعاملين كذا كورس فى مجال الفاشون زى: خياطة وكمان Fashion Sketching & Design – Fashion Sketching Teens – Fashion Design for Teens وغيرها، المكان ظريف جدًا هتحسه كأنه بيتك وممكن تقوم تعمل كوباية حاجة سخنة تشربها وتستمتع وأنت شغال.

فروع المركز: المعادى – الشيخ زايد

أكاديمية نقوش للفنون اليدوية:

أول مركز معتمد فى مجال الأزياء والموضة والحرف اليدوية فى مصر والشرق الأوسط من الأكاديمية الدولية City & Guilds اللى بتؤهلك للعمل داخل وخارج مصر بشهادة دولية، بيدرس فيه نخبة من الأساتذة الفنانين الأكاديميين والحرفيين، بالإضافة إلى برامج اكتشاف وتنمية مواهب الطفل.

عندهم فى قسم الأزياء كورسات كتيرة منها: دورة تصميم أزياء -  دورة باترون وتفصيل- دورة باترون وتفصيل متقدم -  دورة سواريه وتشكيل على المانيكان، وبيقدموا منحة مجانية لكورس السواريه والتشكيل على المانيكان (بشرط اجتيار المقابلة الشخصية وامتحان تحديد المستوى والشروط اللى ممكن تعرفها من هنا).

عندهم كورسات فى مجالات تانية زى: المشغولات الجلدية، الحلى والإكسسوار، والطبخ، وكمان بيقدموا ورش فى المحافظات زى: قنا، الأقصر، أسوان، المنيا، الإسكندرية، الغردقة، سيوة، والبحر الأحمر.

فروع المركز: مدينة نصر – الدقى.

Alef Art & Education:

عندهم كذا قسم للفاشون، كورس الباترون عليه منحة مقدمة من مؤسسة أيادى مصرية، والمنحة مستمرة لحد ما يبقى فيه 1000 متدرب حصل على المنحة دى، كل المواعيد متاحة للمنحة فى الـ 3 فروع، أما بالنسبة لكورسات تصميم الفاشون والتشكيل على المانيكان بتكون Private مش فى مجموعات زى الباترون.

بيقدم المركز كورسات فى مجالات تانية زى: عمل عرائس الكروشيه – صناعة إكسسوارات وشنط من الجلد الطبيعى – عمل الزجاج المعشق والملون والموزاييك – فن النحت والخزف – فن الديكوباج – طباعة الأستنسل وغيرها كتير، عندهم أكتر من 30 ورشة للأطفال من سن 3: 14 سنة، وأكتر من ٧٠ ورشة مختلفة برايفت فى كل المجالات الفنية.

فروع المركز: المقطم – وسط البلد – مصر الجديدة