فى
فترة الحظر وإحنا قاعدين فى البيت بنحاول نحمى نفسنا من جائحة كورونا/ كوفيد-19
بقينا كلنا بندور على كورسات أونلاين نتعلم منها حاجة مفيدة وتشغل وقتنا، ولأن
المزيكا بتغير موود الواحد فى الظروف العادية فبالتالى فى وسط الظروف الحالية كانت
هى الطلب الأكبر الفترة اللى فاتت وجات لنا أسئلة كتيرة: فين الأماكن اللى بتدى كورسات أونلاين فى مجال
الموسيقى/ الغناء؟
يلا
كل واحد فينا يطلع الفنان اللى جواه، هنقدم لكم الكورسات المتاحة دلوقت أونلاين تقدروا
تتواصلوا مع المركز علشان تعرفوا طريقة الحجز والدفع هتلاقوها فى لينك "فروع/
مكان المركز" فى آخر كل فقرة:
ميوزيك زون –
Music Zone:
المركز بقى له 10
سنين فى مجال تدريب العزف على الآلات الموسيقية، بيقدم كورسات لآلات كتيرة زى: الجيتار،
البيانو، الكمان، الدرامز، وآلة Ukulele، والتشيللو والعود،
والقانون والناى وكمان فوكاليز وكورال (إنجليزى وعربى وإيطالى) لكل الأعمار سواء
دروس خاصة أو فى مجموعات، وبتحصل فى نهاية الكورس على شهادة معتمدة من جامعة London
College of Music.
الكورسات بتبدأ من
سن 5 سنوات، المدربين هناك متخصصين خريجى كليات ومعاهد موسيقى متخصصة
وتربوية، شغالين أونلاين بالنسبة لآلات البيانو والجيتار والغناء فقط، وهيفتحوا Offline
يوم 20 يونيو 2020 هيكون 3 أيام فى الأسبوع، الأسعار ٦٠٠ جنيه شهريًا لكل الآلات
ماعدا الغناء ٧٠٠ جنيه، لو أنت مش عندك الآلة بتاعتك متوفر هناك
آلات للبيع وممكن يساعدوك تشترى الأرخص والأفضل حتى من أى مكان.
مكان المركز: الشيخ زايد
آرت مانيا
- Art
Mania:
مدرسة تعليم عزف على آلات: كلاسيك وإلكتريك جيتار، وبيانو، وعود، وكمان،
ودرامز، وبيركشن، وفوكاليز (عربى وإنجليزى)، وفيولا وكورال عربى، وعندهم كورسات فردى وجروب، بقى لهم حوالى 7 سنين فى المجال.
هما كمان بيقدموا فى الوقت الحالى كورسات
أونلاين (فردى فقط)، تفاصيل الكورسات والحجز بيكون من خلال الموقع بتاعهم www.artmaniaonlineshop.com مدة الحصة ٤٥ دقيقة، مرة فى الأسبوع، بس لو فيه
ناس بتحب تزود عدد الحصص متاح مقابل Fees
إضافية.
وعلى نفس الموقع ممكن
تشترى من عندهم آلات موسيقية للى أول مرة يتعلم وممكن تعمل لها أوردر أونلاين
والتوصيل لأى حتة فى مصر، كمان عندهم ستوديو مجهز بمعدات علشان
التدريبات.
مكان المركز: الشيخ زايد
مركز
فنون - Finoon
Arts Education Center:
المركز شغال من سنة 2012، بيقدموا كورسات عزف على آلات: الجيتار بأنواعه – البيانو/ الكيبورد – الكمان – التشيللو - العود – الساكسفون – الدرامز – البيركشن – الفلوت/ الريكودر فلوت – الناى – الغناء والفوكاليز، كل الكورسات
بداية من سن 6 سنين، وتقدر تختار بين نظام الدراسة
الحر (العزف الحر) أو الأكاديمى (النوتة الموسيقية).
الكورسات الأونلاين اللى بيقدموها دلوقت عبارة عن 4 حصص بـ 400
جنيه (سعر مخفض)، بواقع حصة فى الأسبوع مدتها ساعة بتتم عن طريق برنامج Zoom،
لو أنت مش
عندك الآلة بتاعتك متوفر عندهم بيع للآلات الموسيقية.
مكان المركز: مدينة نصر
ساقية عبد المنعم الصاوى – Sawy Culturewheel
اتأسست
الساقية سنة 2003 (17 سنة) ومن وقتها كانت من أوائل الورش اللى اتعملت فيها ورش
الموسيقى والعزف على الآلات، فى الظروف العادية بيقدموا الورش لأعضاء الساقية فقط (قيمة
العضوية 100 جنيه
لمن هم تحت العشرين أو فوق الستين، و150 جنيه لمن هم بين العشرين والستين، وتجدد
سنويًا)، بيقدموا
ورش بيانو وكمان شرقى وعود وإيقاع وغناء وجيتار وكمان، لكن دلوقت بعد أزمة فيروس
كورونا بيقدموا الورش أونلاين من خلال فيديوهات لايف و"مجانًا" على صفحة
ورش الساقية على الفيسبوك.
مكان
المركز: الزمالك
موقع وأبلكيشن إعزف:
الموقع أردنى
وبيقدم فيديوهات عالية الجودة لتعليم عزف على الآلات الموسيقية زى: العود والجيتار والبيانو والناى
والقانون والكمانجة والطبلة والغناء وتعليم عزف الأغانى المعروفة على يد مدرسين
موسيقى من المنطقة العربية والعالم حائزين على جوائزة عربية وعالمية.
بيعلموا عزف على الآلات
الموسيقية الشرقية والغربية، عندهم اشتراك شهرى ونص سنوى وسنوى، وموفرين بعض الكورسات
المجانية ممكن تشوفوها من اللينك هنا.
مركز
جليليو للفنون - Galileo
Art Center:
سنتر جليليو
متخصص فى تعليم عزف الموسيقى والرسم والتصوير الزيتى وغيرها من الفنون، بالنسبة
للمزيكا بيقدموا كورسات للأفراد أونلاين من البداية لحد ما يوصلوا إلى مرحلة
الاحتراف، بيقدموا كورسات عزف على الجيتار الكلاسيكى والإلكتريك والأورينتال،
والبيانو الكلاسيكى والجاز، والعود، والطبلة، والرق، والجيمبى، والدف، والدهولة، والكاخون،
والكونج ، والبونجز، والصولفيج، كمان عندهم تدريبات على نبرة الصوت للمهتمين
بالغناء، وبيساعدوك تجيب الآلة منين لو أول مرة تتعلم.
سعر الكورس 400
جنيه 4 محاضرات فى الشهر (ساعة أو ساعة إلا ربع) من خلال برنامج Zoom، السعر ده
ثابت للآلات كلها.
خلال الكورس
بيكون المتدرب ملم بقراءة النوتة الموسيقية باختلاف الآلات وقواعد ونظريات الموسيقى
والإيقاعات باختلافها والصولفيج الغنائى والإيقاعى وقواعد التأليف والمصاحبة
والارتجال والهارمونى، وكمان عندهم تأهيل للالتحاق بكليات التربية الموسيقية
والتربية النوعية قسم موسيقى تحت إشراف مدربين متخصصين تربية موسيقية.
فروع
المركز:
مدينة نصر - المهندسين
Tango Music
Center:
المركز عنده خبرة أكتر من 30 سنة فى مجال تعليم الموسيقى للأطفال
والكبار، عندهم تعليم باللغتين العربى والإنجليزى على يد مدرسين متخصصين
وبروفيشنال، وكمان بيأهلوا الدارسين لامتحانات Trinity Guildhall London Exams.
بيقدموا فى الوقت الحالى كورساتهم كلها أونلاين، الكورس مدته نص
ساعة أو ساعة إلا ربع، سعر النص ساعة بـ 450 جنيه أو الساعة إلا ربع بـ 550 جنيه
فى الشهر، 4 مرات فى الشهر (مرة فى الأسبوع) بيتحدد الميعاد المناسب للشخص مع
المركز، والسعر ده ثابت للآلات كلها.
الحصص متاحة للأطفال من سن خمس سنوات والسن مفتوح للكبار، باستخدام
الكتب والأساليب المناسبة فى التدريس، بالنسبة للأطفال بيعلموهم كيفية قراءة
النوتة الموسيقية والعزف مع تنمية قدرات اليدين على العزف السليم بالتدريج.
مكان المركز: القاهرة
الجديدة
