الفوود ستايلينج وسنينه

يعتبر الفوود ستايلينج من المجالات الجديدة للشغل فى مصر ويمكن ناس كتير لسه ما تعرفوش أو ما تعرفش على وجه الدقة الفوود ستايليست ده شغلته إيه بالضبط.

الفوود ستايلينج بشكل مبسط جدًا هو: "علم إعداد الطعام للتصوير لأغراض تجارية أو جمالية" وده بإظهاره فى أحسن صورة عن طريق استخدام أدوات معينة وتقنيات معينة، وده طبعًا مهم جدًا لقطاع اقتصادى كبير زى قطاع الصناعات الغذائية فى مصر وقطاع المطاعم والخدمات الغذائية والكاترينج، لكن للأسف زى ما قلت المجال لسه من المجالات الجديدة فى مصر، ومشكلتنا دايمًا أن العملاء مش فاهمين أهمية الفوود ستايليست، يعنى العميل متخيل إن الطبق اللى فيه الأكل هيخرج من مطبخه والمصور هيصوره وبس، فيه حلقة فى النص مفقودة عند العميل عن أهمية شغلنا وده اللى بيخلى مهمتنا أصعب.

بالنسبة لى بدأت أتعلم الفوود ستايلينج من 4 سنين.. فى الأول أسست صفحة "هبة فى المطبخ" علشان أعرض فيها وصفاتى الخاصة اللى بانشرها فى المواقع والمجلات بشكل احترافى، بعد كده طورت من نشاطى واحترفت الفوود ستايلينج علشان أجذب جمهور أكبر لكتاباتى فى مجال الطعام ووصفاتى اللى باقدمها عن طريق إنى أصور الوصفة صورة مثالية وبالتالى تجذب أكبر قدر من المتابعين، ومن سنتين بس بدأت اشتغل فوود ستايليست بشكل احترافى وأسست صفحتى اللى بانشر عليها شغلى.

بالنسبة لشغل الفوود ستايليست فهو بيبدأ قبل ما تروح مكان التصوير، لازم تعرف الفكرة اللى بتدور فى بال العميل وتبدأ تحضر نفسك وأدواتك لتنفيذ الفكرة دى، وتتفق مع العميل على الشكل اللى عاوز صوره تظهر به وتفاصيل الصور من زاوية التصوير للإضاءة للألوان اللى حابب يركز عليها، بعد كده بتقابل الشيف وبتعرف منه طريقته فى تقديم الطبق.

يوم التصوير بتاخد المكونات وبتبدأ تشتغل بها وتجهز الطبق طبقًا للـ Reference المتفق عليه مع العميل وطبقًا لشكل الطبق اللى بيخرج من تحت أيد الشيف، بعد كده تجهز مكان التصوير ببعض الأدوات والإكسسوارات اللى مهمتها تبرز الطبق وتضبط زاويته أمام الكاميرا والباقى على المصور بقى.

بالنسبة بقى للأدوات والإكسسوارات أو ما يسمى "البروبس" اللى الفوود ستايلينج بيشتغل بها فدى نقطة كبيرة أوى ومحتاجة مناقشة جادة، لأن البعض بيتخيل أنه مادام معاه بروبس حلوة وغالية أو بروبس قديمة ومجموعة خلفيات وأرضيات ملونة حلوة بيشتغل بها فهو كده حقق التارجت ويقدر يبدأ شغل.

لأ.. للأسف لو أنت بتفكر كده فده تفكير مش سليم، لأن الفوود ستايليست الحقيقى يقدر يشتغل بدون بروبس أصلاً لأن شغله الأساسى على الأكل اللى لازم يكون فى أحسن صورة، ولو البروبس ما قدرتش تقدم الفكرة دى فكده الشغل كله مش سليم.

الخلاصة.. الفوود ستايليست يعرف يعمل أى أدوات معاه بروبس قيمة.. لكن البروبس القيمة للأسف ماتعملش فوود ستايلست ناجح.

لو مثلاً بتعمل ستايلينج لساندويتش برجر لازم تهتم بترتيب الطبقات بشكل يبرز كل طبقة ويوضح مكوناتها بأفضل صورة ودى بتكون دايمًا عملية مش سهلة ومحتاجة تدريب مستمر، أو لو بتعمل طبق باستا فأنت فعليًا بترص وحدات المكرونة واحدة واحدة فى الطبق، غير طرق طهى وتجهيز اللحوم والدواجن بشكل مناسب للتصوير، ودى كلها عمليات مهمة جدًا وبتستغرق وقت من ربع ساعة لساعة، حسب مكونات الطبق وطريقة ترتيبها وتداخلها فى بعضها، وده مش عشوائى لأنه لازم يتعمل بشكل مناسب ومحقق رؤية الشيف فى الطبق، وهى عملية قائمة أولاً وأخيرًا على احترافية الفوود ستايليست مش على كم البروبس اللى بيملكها أو بيستخدمها فى التصوير.

كلمة أخيرة أحب أقولها لأى حد يحب يحترف مجال الفوود ستايلينج.. بانصحه أنه لازم يكون فيه شوية صفات، زى أنه لازم يكون عارف خصائص المكونات اللى بيتعامل معاها ودارسها كويس، كمان يكون فاهم مبادئ الطبخ الأساسية، ويكون عنده قدر كبير من التذوق الجمالى والقدرة على إبرازه فى حاجات عادية زى مكونات الطعام، بالإضافة لبعض الصفات الشخصية زى التنظيم والترتيب وسرعة البديهة والثقة فى النفس والقدرة على ابتكار الحلول المختلفة وتوقع الأسوأ دايمًا والقدرة على مواجهته.

بعد كده بقى الدراسة والتدريب سواء كان تدريب نظامى مع مدرب فى الكورسات أو تدريب شخصى بيقوم به الشخص بنفسه، والأهم من ده كله لازم يكون هادى وصبور.. نقول تانى.. لازم يكون هاااااادى وصبور.

وآخر حاجة أحب ألفت النظر لها أن لازم تتفرج على صور كتير الفوود ستايلينج بتاعها معمول صح علشان تعمل تغذية بصرية لموهبتك.. وفى الآخر تفكر فى ستايل خاص بك يميزك عن غيرك.