من الشائع والمتداول دايمًا أن المطاعم من أسهل أنواع البيزنس للأسباب التالية:
هينصحوك ويقولوا لك الناس مش هتبطل أكل (هيبطلوا لو أكلك مش حلو صدقنى)، يا إما كل أصحابك وقرايبك بينصحوك تفتح مطعم لأنك بتعمل أحسن لازانيا (فكر شوية كده أنت عازمهم.. يعنى ما دفعوش فلوس وموجودين فى بيتك فلازم يقولوا كده)، أو لو بتشتغل حاجة مالهاش علاقة بمجال الأكل ومعاك قرشين فتفتح مطعم (حاجة كده للزمن).
طيب اعمل إيه علشان أفتح مطعم ويكون عندي "فرصة أنى أنجحه" ودى تحتها خط لأن المطعم زى البيبى محتاج أنك تراعيه وتصرف عليه وتهتم به لحد ما يقف على رجليه.
نصيحتى أنك أولاً تدرس السوق والمستهلك محتاج إيه (اعمل استبيان علشان تعرف السوق محتاج إيه)، ثانيًا لازم تفهم جانب البيزنس كويس سواء كان أوبريشن أو الجانب المالى، هنتكلم عن جانب الأوبريشن الأول وده مهم جدًا.. ليه بقى؟!
لأنه بيساعدك تعرف عدد الموظفين وإزاى تقسم كل منطقة عمل ومن خلال تحديدك لساعات العمل والخدمة وأجازات الموظفين هتقدر تكون دقيق إلى حد كبير فى إعدادك، وافتكر دايمًا أن مرتب الموظف يشمل الضرائب والتأمينات والتأمين الصحى وجميع الامتيازات الأخرى، فلازم تتأكد من العدد الصحيح.
تصميم المكان مهم كمان.. يعنى هل المكان عملى سواء كنا بنتكلم عن مساحة المطبخ مقارنة بالصالة، وهل المطبخ مريح ومقسم بحرفية (لأن ده المكان اللى بيعمل لك فلوسك) وهل الصالة منظمة بصورة تتناسب مع الفكرة ومدى جودة الأثاث، وهل الأثاث عملى وسهل التنظيف، وكل شئ يتعلق بالجانب ده من العمل.
أما بالنسبة للجانب المالى فهو برضه مهم جدًا، لأن هامش الربح فى المجال ده مش بيكون كبير (فى معظم الأحيان لا يتجاوز الـ 6%)، ثالثًا اختيارك لنوعية المنيو اللى هتقدمه (يفضل أن يكون اعتمادك على المنتجات الموسمية والمنتجات المحلية لضمان استمرار الجودة).
رابعًا اختيار فريق عمل يتميز بالإيجابية والتعاون، وخامسًا ما تكونش صاحب البيزنس المتسلط والمدير الآمر، لكن كن القائد اللى بيدعم فريقه ويسمع لهم، ودى حاجة مهمة جدًا لأن تدخلات صاحب المكان فى كل شئMicromanagement بتضعف من قوة المدير وتخلق نوع من التفرقة والقلق فى المكان، سادسًا وأخيرًا الفكرة نفسها سواء الـ Concept نفسه والديكور وكل التفاصيل زى اليونيفورم وطريقة الخدمة سواء كانت Fast food، Fast Casual، Casual، Fine Dinning.
كل تفصيلة صغيرة من النقاط السابقة بتعمل فرق لأن العميل بيحس وبيفهم فى الجودة، والموظف السعيد بيقدم خدمة ممتازة، وبساطة المنيو المقدم بيوصل بسهولة لقلب العميل، وافتكر دايمًا أن العميل ساب بيته بعد ما لبس هدومه وتحمل عناء السواقة وركن العربية ووصل لحد بابك، وبالتالى قام بـ 90% من الموضوع وكل اللى تبقى لك هو حسن لقاءه وتقديم الأكل له بأعلى جودة، فالمطعم ما بيقدمش أكل بس، بل بيقدم خبرة ممتعة فاحرص على وصولها بأحسن صورة.
