إزاى تسيطر على العالم من خلال الكوميكس؟

بعض اللوحات عينك بتمر عليها سريعًا، يمكن يعجبك قدرة الرسام وإبداعه أو شكل الرسمة بس، لوحات تانية ممكن تقعد تتفرج عليها فترة، تحس أنها بتقول حاجة، كأن الرسام بيخاطبك وسايب لك رسالة سرية فى اللوحة مخفية.

الكوميكس مش مجرد رسومات فنية، هى قصة مكتوبة أولاً ثم مرسومة داخل مجموعة من الكادرات، ربما تكون داخل صفحة أو مجموعة من الصفحات، الغرض منها مش إظهار لوحة جميلة قد ما هو السيطرة على عقل القارئ علشان يبقى منسجم مع تسلسل الأحداث والحوار كأنه شايف صورة بتتحرك وسامع كلام وموثرات صوتية بينما مافيش أى حركة وصوت حقيقى، الكلام ده كله فى عقله أثناء متابعة عينيه للرسومات وتقليب ورق الكتاب بأيديه، وكأنه بيتفرج على فيلم بس الفرق أنه متحكم فى طول فترة المشاهدة وفى تخيله لسماع الأصوات المكتوبة.

قبل ما نتكلم عن السيطرة على العالم من خلال الكوميكس، هنتكلم عن جزء منها وهنبدأ بالرسم:

فيه ناس عندها اعتقاد أن الرسام ده كائن "موهوب" يعني مميز عن غيره من الكائنات، والحقيقة أن ده كلام غلط، هو إنسان بيتولد من بطن أمه عادى فى الأول لحد ما يُبدى اهتمام بالشخبطة والرسومات البدائية الشبيهة برسومات أهل الكهف أكتر من غيره من الأطفال المحيطين به، فمع كتر الممارسة اليومية ومعافرته مع أهله اللى بيضربوه علشان ما يرسمش على الحيط بتتخلق عنده علاقة عاطفية مع القلم أو الورقة (أو الحيط) وبيكون خبرة وحس أعلى من اللى حواليه اللى مش بيمارسوا الحرفة دى بشكل دائم زيه، فمن الآخر لو حضرتك أبديت اهتمام بأى حاجة نفسك تحترفها دلوقتِ ومارستها بشكل يومى هتنجح وهتبقى محترف فيها والناس هتقول عليك "موهوب".

رسام الكوميكس محتاج يرسم كل حاجة: عربية، مطعم، أنس، جن أزرق، وأخضر، عدة سباكة، أدوات التعذيب اللى عند دكتور الأسنان... ارسم كل حاجة تخطر على بالك وما تحصرش نفسك فى رسم بورتريه أو تصميم شخصيات فقط لإن الشخصيات محتاجة تتحرك فى أماكن وتلعب بحاجات.

جزء تانى من صناعة الكوميكس هى الكتابة، لو لاحظتم أن أنا ما رسمتش علشان أشرح لكم حاجة، أنا دلوقتِ باكتب بس، ومن خلال الكتابة دى وصلت لكم صورة، صناعة الكوميكس زى ما الرسم فيها جزء مهم، فالكتابة ممكن تكون أهم كمان، أنت هتحكى حكاية، لو الحكاية دى وحشة عمر ما الرسم هيعليها بالعكس لو الرسم بسيط لكن القصة جذابة هتقدر توصل لعدد أكبر من القراء، هتحتاج تقرأ كتير علشان يبقى عندك حاجة تتكلم عنها بعد كده.

جزء تالت وهو الإخراج، أنت مش بس رسام وكاتب، لأ كمان مخرج سينمائى، لازم تتفرج على أفلام كتير مش كوميكس بس، تفهم تكوين وإضاءة وتصوير ومونتاج علشان تعلى الحس الدرامى عندك، المخرج فاهم فى التمثيل كويس وكذلك رسام الكوميكس، علشان يخلى الشخصيات فى القصة بتاعته تتحرك بشكل مقنع وتوصل للواقعية اللى تؤثر فى المشاهد.

آخر حاجة هاتكلم عنها وغالبًا أنتم هنا علشانها: إزاى هتسيطر على العالم؟

فيه شخصيات زى سوبرمان وباتمان ظهروا للنور من ييجى 80 سنة وعمرهم فى القصص لسه 30 سنة، أنت متخيل أن فيه ناس اتولدت وعاشت وخلفت وماتت وولادهم كبروا وخلفوا ولسه الشخصيات دى عايشة وهتفضل عايشة بعدينا كلنا؟

أنت تقدر تسيب رسالة أو علامة أو شخصية الناس تمشى وراها لعدد سنين لا نهائى وتوصل لأجيال بعد أجيال بحاجة كان اسمها Comics يعنى قصص "هزلية"، فيه لوحات في المتاحف عايشة بقى لها قرون، وفيه كتب الناس لسه بتقراها بقى لها قرون برضه، وفيه أفلام مش بتموت، تخيل حاجة بتجمع كل الفنون دى وبتزرعها فى عقل طفل ومراهق وشاب وبابا وماما وتيتة وعمو...

ها؟.. لسه مش عارف إزاى هتسيطر على العالم؟