فى حى من الأحياء الشعبية جلس أحد الشباب فى ركن
بالقهوة وبيده كتاب، ظل يقلب الصفحات دون جدوى.. وقد أحس بالوقت الذى مر وهو ما زال
يبحث.
واحد قهوة بعد إذنك.
ده تالت فنجان يا أستاذ.
ياعم هو أنت عازمنى؟ (محدثًا نفسه) ما هو يا أنا
يا الكتاب.
يبدو أنه كان مهتمًا بدرجة كبيرة، فهو يبحث طيلة
الأسابيع الماضية عن الكثير من الكتب التى تتكلم عن شئ واحد، قد هام به شغفًا، وفى
نفس الوقت لازال ينتظر صديقه الذى طالما أثار شغفه بهذا الفكر الذى كان ناتجه
إحضار الكثير من الكتب.
يدخل رجل إلى القهوة يرتدى ملابس مصمتة الألوان،
تعلو وجهه الابتسامة، ويحمل حقيبة مليئة بالكتب.. وعندما رأه القهوجى رحب به
بحرارة.
أستاذ محمد.. أهلاً يا أستاذ.. والله لك وحشة.
حبيبى وأنت كمان.. معلش أصل كان عندى شغل كتير.
حمد الله على السلامة.. على فكرة صاحبك مستنيك بقى
له فترة كبيرة وشرب قهوة كتير.
بس أنا جيت فى ميعادى ما تقلقش.
يتجه صوب صديقة صاحب الكتب وما زالت تعلو وجهه
الابتسامة.
ما تأخرتش أهو صح.
أكيد.. شكل الموضوع ده منضبط جدًا.
أكيد.
كان شغفه طيلة كل هذه الفترة هو أبو الفنون... "المسرح"...
الذى طالما حلم بالوقوف عليه وتعلمه.. وانتظاره لصديقة كان أشبه بانتظاره للحلم
الذى طالما أراد تحقيقه.
قول لى بقى أنا عاوز أعرف حاجات كتير أوى
ومعانيها: المسرح، بروفات الترابيزة، الميزانسين، الخشبة، الكمبوشة، الكوانتة،
البنطلون، الهرسة....
(مقاطعًا): حيلك حيلك.. بالراحة
شوية.. ما تستعجلش.. بص يا سيدى.. المسرح هو أبو الفنون.. طبعًا هتقول
لى يعنى إيه؟...
(يومئ برأسه): ده حقيقى.
علشان بيضم أنواع كتير من الفن جوه فن واحد.. يعنى هتلاقى جواه التمثيل
والإخراج والموسيقى والغناء والديكور والملابس والماكياج والإضاءة.
كل ده؟!
(يكمل): أيوه كل ده، وعلشان كده هو أبو الفنون، ولأنه كمان كان أول أشكال
التمثيل فى العالم أو بالأدق فى التاريخ.
طيب له أنواع؟
أيوه.. فيه المسرح المتكلم، والصامت، والغنائى، والاستعراضى، والمونودراما،
والديودراما.
إيه أخر اتنين دول؟
المونودراما يعنى مسرحية الشخص الواحد، مسرحية فيها كل العناصر إلا أن
ممثل واحد اللى بيؤديها، أما الديودراما فبيقوم بتمثيلها شخصين بس.
طيب يعنى إيه بروفة؟
ده بيكون وقت التدريب، وبيتم فيه التدريب على
التمثيل وتطبيق النص المسرحى.
إيه النص ده؟
ده الكلام اللى بيقوله الممثلين على المسرح، وأول
مؤلف سجله التاريخ كان اسمه أسخيلوس وده من الأغريق.
طيب له مولفات فى السوق؟
أه.. كتير كمان.
طيب إيه بروفات الترابيزة دى؟
دي بتكون بروفات تدريبية بس على القراءة بس
وتطوير الأداء.
طيب والميزانسين؟
أهو ده بقى هو علم خطوط الحركة... بمعنى أن مافيش
ممثل أبدًا علي المسرح بيتحرك بشكل عشوائى، إنما بيتحرك على أسس وحركات منضبطة
بيقوم برسمها مخرج العرض، ولازم طبعًا يكون دارس العلم ده.
طيب إيه هى خشبة المسرح وعناصرها؟
الخشبة هى مكان التمثيل، وعلى يمينها وشمالها
بيكون موجود أماكن التمثيل اللى اسمها الكواليس (ومفردها كالوس) وبيحددها حاجة
اسمها البناطيل (ومفردها بنطلون) ودى بتكون قطعة قماش كبيرة بتفصل بين أجزاء
الكواليس المختلفة.
أما الكوانتة فدى بداية الكواليس من ناحية
الجمهور، والكمبوشة مكان الملقن اللى كان بيقول الكلام للممثلين زمان وده ما بقاش
يستخدم دلوقت خلاص، أما الهرسة فهى مكان تعليق أجهزة الإضاءة، أما الأفانسيه فهى
مقدمة المسرح، يعنى أول جزء من أجزاء خشبة المسرح واللى بيواجه الجمهور.
طيب كلمنى بقى عن عناصر العرض المسرحى.
ببساطة هى: النص المسرحى، والإخراج، والموسيقى،
والسينوغرافيا.
إيه الموضوع ده بقى؟
السينوغرافيا علم الفراغ المسرحى، أو فى تعريف
تانى هى كل ما يقع عليه عين المتفرج، يعنى العنصر البصرى اللى بيتمثل فى الديكور
والأزياء والماكياج والإضاءة، ودى من أهم عناصر العرض المسرحى.
يدخل القهوجى مقاطعًا..
مش ملاحظين أن النهار طلع؟
ما أخدناش بالنا خالص والله... معلش بقى أصل
القعدة حلوة.
