معاناة الدايت!

كتير مننا بيمر فى مرحلة من عمره وبيعمل دايت بغض النظر عن السبب: فرحه قرب، تخن بعد الجواز، الصيف داخل... تعددت الأسباب والنتيجة واحدة "عاوز أخس!".

دايمًا فى موضوع الدايت ده بنخاطب الستات لأنها بتبقى مهتمة أكتر بنفسها وبشكل جسمها، بس فى ظل الوضع الحالى كله عاوز يخس، وكله مهتم، وكله برضه عنده أسبابه.

لازم نعرف إيه اللى جابنا هنا أصلاً، ما الناس طول عمرها بياكلوا أرز وخضار ومسبك وبالسمن البلدى.. إيه اللى حصل؟ إيه اللى وصلّنا فى ٢٠١٠ أن مصر تبقى أكتر بلد فيها سمنة فى أفريقيا وفى المرتبة الـ ١٤ على العالم!

أقول لكم... اللى حصل "تغيير السلوكيات"، فى الأول وفى الآخر الأكل ده عادة غذائية وسلوكيات، إيه بقى اللى اتغير؟

ثورة صناعية.. كمية أكل مُصنَع، مُكرَر، فى أكياس، فى علب وجاهز على التحضير، ولا إحنا فاهمين بناكل إيه، ولا ده الأكل اللى ربنا خلقه وبنستسهل وخلاص.

العربية، المواصلات والأسانسير.... بالبلدى كده بطلنا نتحرك.

ضغط من الوضع والغلو ومعاناة الحياة، ده خلى الناس آخر حاجة تفكر فيها صحتها ولا فارق بتدخل إيه فى جسمها.

الأكل حتى لو كان طبيعى مش زى زمان من كتر ما بقى فيه آفات ومجاعات.. كل المحاصيل بقيت معدلة وراثيًا وكل ما تنتج أكتر وكل ما تستحمل العوامل الخارجية كل ما كان أحسن.

نرجع بقى لموضوع الدايت...

ليه مش بنستمر أو بنعمل الدايت وبنخس ونرجع نتخن تانى؟

طول ما أنا باصص للدايت على أنه فترة من حياتى وإن شاء الله هخلص دايت وارجع زى زمان يبقى مالهاش لازمة.

نظرة الإنسان للنظام الغذائى أو الريجيم نظرة تشاؤمية جدًا.. نظرة حرمان فبالتالى مش قادر يعتبر ده حاجة طبيعية، لكن أنا لو ماشى على النظام اللى يناسب جسمى، واحتياجاتى والأكل اللى باحبه  ومواعيد نشاطاتى اليومية من غير ما أجى على حاجة تانية مدى التزامى هيبقى أكتر وهاقدر أغير سلوكى أنى ابقى إنسان صحى.

هأقول لكم شوية حاجات بسيطة لو اتغيرت فى حياتكم اليومية هتساعدكم كتير وهتحطكم على أول الطريق من غير ما تحسوا أنكم بتضحوا بعمركم علشان تخسوا:

أول وأهم حاجة: اعمل لنفسك نظام

كده كده كل واحد عنده نظام فى حياته اليومية ما تغيروش علشان خاطر الدايت، دخل الدايت فى النظام اليومى، ضبط مواعيد أكلك على مواعيد البريك فى الجامعة أو فى الشغل، على مواعيد المدارس وتمارين الأولاد وحاول دايمًا تخليهم ثابتين.

تانى حاجة: اشرب مياه كويس

ناس كتير أوى اتكلمت على موضوع المياه ودى مش حاجة جديدة، بس هنفضل طول عمرنا نتكلم عن فوائد المياه واللى معظم الناس ما تعرفوش أن إحنا ربنا خلقنا ما بنعطش.. أيوه ما بنعطش.. لو عطشت يبقى أنت عندك جفاف، مخ الإنسان ما بيفهمش يعنى إيه عطشان فبيترجمه جعان، وبالتالى كتير أوى بنفتكر أن إحنا جعانين وناكل ولكن فى الحقيقة إحنا عاوزين نشرب.

تالت حاجة: اتحرك شوية

"ما عنديش وقت اروح الجيم".. "ما باحبش الجيم".. بنسمعها كتير أوى وده طبيعى وإحنا مقدرين ده جدًا، وعلشان كده مثلاً يا سيدى اركن عربيتك بعيد، اطلع السلم أو اركب المواصلات من بعيد، كل دى حاجات هتخليك تتحرك أكتر من غير ما تاخد من يومك وقت كتير.

رابع حاجة: كفاية سكر

لما باقول كده للناس اللى بتتابع معايا بيقولوا لى إحنا بنشرب الحاجات من غير سكر، وهنا بنقول أن السكر مش بس سكر أبيض، كمان الدقيق الأبيض بيتحول لسكر زى الكيك، والباتيه، والكرواسون والبسكويتات وحاجات غيرها كتير.

وعلشان كده عندنا قاعدة بلاش سكر أبيض أو دقيق أبيض تمامًا، وتانى وأهم قاعدة "امنع السكريات بالليل"، بعد الساعة ٥ العصر، بلاش أرز، أو مكرونة، أو عيش، أو بطاطس أو فاكهة، أيوه وكمان الفاكهة.

خامس حاجة: خطوة خطوة

أدى نفسك فرصة.. واحدة واحدة على جسمك، مش لازم نبدأ نظام جامد أوى واحرم نفسى، ممكن ابدأ بتغيير حاجات بسيطة وشوية بشوية هاعرف امشى على نظام شديد.

وما تحرمش نَفسك لو نِفسك فى حاجة كُلها بس مش بكميات كبيرة وضبطها فى مواعيد الأكل واستخدم وجبة واحدة كوجبة فرى مش يوم كامل.

شوية تغيير سلوكيات بسيطة هتساعدك تخس وتوصل للشكل والجسم اللى أنت بتحلم به.